وليمپياداعا 10 ەلدىڭ 24 مەكتەبىنەن 350-دەن اسا وقۋشىلار جينالدى. قوستاناي قالاسىنداعى جىلدام وقۋ جانە بالالاردىڭ ينتەللەكتىن دامىتۋ مەكتەبىندە مەنتالدىق اريفمەتيكامەن اينالىساتىن 5 بالا باعىن سىناپ كورۋگە دۋبايعا جولعا شىققان بولاتىن.
– ءبىزدىڭ بالالار شەتىنەن دارىندى. ولار وبلىس ورتالىعىنداعى ەڭ وزات مەكتەپتەرگە بارادى. ال ءبىزدىڭ مەكتەپكە ولاردى اتا-انالارى بالانى ودان ءارى دامىتۋ ءۇشىن بەرگەن بولاتىن, – دەيدى مەكتەپ مۇعالىمى شولپان نۇرقانوۆا.
وليمپياداعا بارعان ازات قوجاحمەتوۆ, بوگدان تەن, داريا شۋمۋروۆا, توميريس كالەن, زلاتا كونيەنكو ءبۇلدىرشىن بولسا دا وزدەرىنىڭ ۇستامدىلىعىمەن, تاپسىرمانى ەركىن بىلۋىمەن تاڭقالداردى. ولار ءوز كاتەگوريالارىندا سىنعا ءتۇسىپ, جەر شارىنىڭ ءار شالعايىنان كەلگەن قۇربىلارىنان الدەقايدا باسىمدىق تانىتتى. بارلىعى دا كاتەگوريالار بويىنشا ەكىنشى ورىندى جەڭىپ الدى.
– 350 بالانىڭ ىشىنەن ەكىنشى ورىن الۋ دەگەن ءسوز ءبىزدىڭ وقۋشىلار ءۇشىن زور جەتىستىك. الداعى ۋاقىتتا وزگە دە وسىنداي ۇلكەن جارىستارعا دايىندالامىز. «مەنتالدىق اريفمەتيكا بالاعا ەشنارسە بەرمەيدى» دەگەن پىرىكلەردى ەستىپ قالامىز. بۇل بالانىڭ جادىن جاتتىقتىرادى, دامىتادى, – دەيدى شولپان.
جۇلدەگەگەرلەردىڭ اتا-انالارى الىس جولعا كىشكەنتاي بالاپاندارىن جىبەرۋگە جۇرەكسىنىپ, وزدەرى ولارعا دەمەۋشىلىك جاساپ, ەرىپ باردى. ال جاتتىقتىرۋشىنى مەكتەپ جىبەرگەن.
ءنازيرا جارىمبەت,
«ەگەمەن قازاقستان»
قوستاناي
